Чөркөөххө Улуу Кыайыы 80 сылыгар аналлаах фестиваль кэнсиэрэ

Кулун тутар 14 күнүгэр КСК киэҥ уораҕайыгар «Түмсүү – төлкө төрдө» Улуу Кыайыы 80 сылынан, улуустааҕы нэһилиэкьэр икки ардыларыгар ыытыллар уус-уран самодеятельность фестивалын кэнсиэрэ буолла.

Тэрээһиҥҥэ барыта 99 киһи кыттыыны ылла, ол иһиттэн сувенирнай оҥоһуктар быыстапкаларыгар 22 улахан киһи, 5 оҕо; кэнсиэргэ – 72 киһи, онтон 37 улахан киһи, 35 оскуола үөрэнээччилэрэ кыттыыны ыллылар.

Фестиваль кэнсиэрэ «Ильмень күөл үрдүнэн туруйалар» дьүһүйүүнэн саҕаланна. Режиссер М. П. Яковлева дьүһүйүүнү Чөркөөх олохтооҕо, Ильмень күөлгэ кыргыһыы кыттыылааҕа, учуутал И. А. Вырдылин ахтыытыгар олоҕуран туруорда. Норуот тыйаатырын артыыстара көрөөччүлэри долгутар гына оонньоон, жюри биһирэбилин ыллылар.

Маны таһынан жюри ордук норуот ырыатыгар, хомуска «Көһөҥө ситим» фольклорнай бөлөх (салайааччы Т. В. Яковлева), вокальнай ансаамбыл «Сахам сирин таптыыбын» ырыатын (салайааччы М. П. Гоголев), «Көөчүк» оҕо фольклорнай ансаамбылын толоруутугар норуот ырыатын, хомуска сахалыы матыыптары (салайааччы Р. Н. Филатова) эр дьон «Өйдөбүл күнэ» уус-уран ааҕыытын биһирээтэ.

Хор салаатыгар 2 ырыа ылламмытыттан ордук «Манчаары оонньуутун гимнэ» (биир дойдулаахтарбыт Дьулус Толстяков тыла, Арианна Решетникова мел.) жюри биһирэбилин ылла.

Кэнсиэр таатталыы оһуохайынан түмүктэннэ.

Улуустааҕы жюри кэнсиэр тутулун, ис хоһоонун, оформлениетын биһирээбитин биллэрдэ.

Уопсай түмүк маннык буолла:

Быыстапка — муҥутуур балл-30, Октябрьскай нэһилиэк-22,45;
Арт-инсталляция «Кыайыыга үрдэл» — муҥутуур балл-30, нэһилиэк-21,2;
Дьүһүйүү — муҥутуур балл-50, нэһилиэк-48,41;
Хор — муҥутуур балл-30, нэһилиэк-27,73;
Академическай кэнсиэр — муҥутуур балл-75, нэһилиэк-69,7;
Түмүк балл (муҥутуур балл-215) нэһилиэк-188,9.

Улахан нэһилиэктэр бөлөхтөрүгэр Чөркөөх бастакынан тэрээһиннээхтик, биир сомоҕо буолан үрдүк таһымҥа көрдөрдө диэн нэһилиэк олохтоохторо астынан тарҕастылар.