Кулун тутар 4 күнүгэр Чөркөөх орто оскуолатыгар норуот тыйаатырын, норуот айымньытын дьиэтин, олохтоох бибилэтиэкэ көҕүлээһиннэринэн «Уот Дьулустаан» сериалга уһуллубут нэһилиэк олохтоохторун, оҕолорун кытта көрсүһүү ыытылынна.
Балтараа ый устата уһуллубут сериалга кыралыын-улаханныын барыта 60-ча киһи кыттыыны ылбыт.
Көрсүһүүгэ кыттыыны ыллылар:
-Ефремов Василий Федосьевич – 52 сыл устата сценаҕа оонньообут норуот тыйаатырын бэтэрээн артыыһа. Кини сериалга Ылдьаана улахан убайын кыайа-хото оонньоото;
-Турнина Аграфена Николаевна – сайаҕас-сайдам майгылаах туруу үлэһит кыыс оруолун оонньоото. Аграфена Николаевна бу сериал уһуллуутугар саҕаланыаҕыттан бүтүөр диэри сүрүн көмөлөһөөччү буолан, туох итэҕэһин көрөн, ону булууга элбэхтик сүүрдэ-көттө, устар бөлөххө улаханнык көмөлөстө;
-Багарытов Егор Прокопьевич – бэтэрээн артыыспыт бэрт сэргэхтик бэйэтэ оонньообут оруолун кэпсээтэ;
-Андреева Любовь Михайловна – хамначчыт Аана оруолугар хайдах булан, ыҥыран сериалга устубуттарын кэпсээтэ;
-Жегусова Мария Михайловна – Хобороостооххо дьиэ көрөөччү оруолугар соһуччу ыҥырбыттарыгар бастаан аккаастаан баран кэлин сөбүлэһэн оонньообутун бэрт сэргэхтик кэпсээн күллэртээтэ.
Нэһилиэкпит киэн туттар, элбэх оҕолоох Решетниковтар дьиэ-кэргэттэриттэн сериалга үс кыргыттара уһулуннулар, биир ыйдаах кыра кыыстара биир сүрүн оруолу толорооччу буолла.
II кылаас үөрэнээччитэ Винесса Решетникова киинэҕэ уһуллубутун туһунан бэрт чобуотук билиһиннэрдэ, өссө да уһуллар баҕалааҕын эттэ.
Бииргэ төрөөбүт убайдыы-балыстыы Алексей Михайлович, Жанна Михайловна сериалга уһуллубут түгэннэрин сырдаттылар. Бу сериалга хамначчыттары оонньоотулар. Алексей Михайлович норуот тыйаатырын солбуллубат артыыһа, оттон Жанна Михайловна бастакытын киинэҕэ уһулунна. Оруолларын тахсыылаахтык оонньоон сериалы ситэрэн-хоторон биэрдилэр.
Софронов Хрисанф Пантелеймонович хамначчыт оруолун оонньоон социальнай ситим нөҥүө элбэх көрөөччү сэҥээриитин ылла. Бу проектан ураты Кириһээн өссө документальнай киинэҕэ уһуллубутун эттэ.
Слепцов Никифор Дмитриевич, Аржаков Егор Иванович аттарын бэлэмнээн, уларсан, илдьэн-аҕалан сериал эпизодугар уһулуннулар.
Чөркөөхтөөҕү политссылка музейын үлэһитэ Жерготова Изабелла Яковлевна сериалтан сэдиптээн музей инники сайдыытын, саҕахтарын кэпсээтэ.
Музыкальнай эҕэрдэтин IV кылаас үөрэнээччитэ Валерия Попова тириэртэ. Кини «Ырыа ыллыгынан — сулустардыын» проект кыайыылааҕа.
Олохтоох дьаһалта, норуот тыйаатыра, түөлбэ салайааччылара, тэрилтэлэр эҕэрдэ суруктары, өйдөбүнньүк бэлэхтэри бары кыттыбыт артыыстарга, оҕолорго туттардылар.
Мантан аллараа тэрээһинтэн түгэннэри көрүҥ.