«Күндү биир дойдулаахтарым, Чөркөөх кырдьаҕастара, тыыл ветераннара, сэрии сылларын оҕолоро уонна пенсияҕа тахсыбыт кырдьаҕастар! Эһигини бука барыгытын бу Улуу Кыайыы 80 сыллаах үбүлүөйүнэн итиитик-истиҥник эҕэрдэлиибин! Дьэ, уонна күндү Чөркөөх кырдьаҕастара, эһиэхэ баҕарыам этэ: куруук актыыбынай позицияны тутуһуҥ, Чөркөөххүт үүнэ-сайда турарыгар, улууска биир бастыҥ нэһилиэк буоларын туһугар, нэһилиэк салалтатыгар төһө кыалларгытынан күүс-көмө буоларгыт наадалаах. Бэйэҕит тус холобургутунан оҕолоргутун, сиэннэргитин, хос сиэннэргитин эмиэ бэйэҕит курдук актыыбынай позициялаах, чөл олохтоох, доруобай, чэгиэн-чэбдик доруобуйалаах, нэһилиэктэрин туһугар тугу да харыстаабакка, бэриниилээхтик үлэлиир-хамныыр дьоннору бэйэҕит тус холобургутунан иитэн таһаараргытыгар! Дьэ, уонна тугу элбэҕи этиэмий, үйэҕит уһаатын, доруобай буолуҥ, чэгиэн-чэбдик уонна дьоллоох уһун үйэни! Счастливого долголетия күндү доҕотторум! Кытаатыҥ, этэҥҥэ сылдьыҥ, Чөркөөх аатын ааттата туруҥ!»

Слепцов Наум Трифонович, Дьокуускай, ыам ыйа, 2025 с.

Слепцов Наум Трифонович (1924), Таатта оройуонун Күнээйи нэһилиэгэр 1924 с. төрөөбүтэ. Чөркөөх 7 кылаастаах оскуолатын 1941 с. бүтэрэн, Чурапчы педучилищетыгар үөрэнэ киирбитэ. 3-с куурустан сэриигэ бараары тылламмытын аккаастааннар, кэлэн Чөркөөх интэринээтигэр үлэлээбитэ. Кыһыл Аармыйаҕа 1945 с. Чурапчы оройуонунааҕы холбоһуктаах военкоматынан сайын ыҥырыллыбыта. Байыаннай-политическай бэлэмнэниини Иркутскай уобалас Мальта станцияҕа баран, автоматчик, пулеметчик идэтин баһылаабыта. 08.08.1945 с. 152-с стрелковай полка састаабыгар Аргун өрүһү туораан, Хайлар куоракка тиийэн японецтар бастакы утарсыыларын көрсүбүттэрэ. Билиэннэй дьоппуоннары Советскай Союзка аҕалсан, Чита уобалаһын Яблоневай станциятыгар кинилэр мас бэлэмниир биригээдэлэрин харабыллыырга сылдьыбыта. 1946 сс. 205-с армейскай Хинганскай самоходнай ыарахан танкалар колонналарыгар 45-с нүөмэрдээх зенитнэй батарея наводчигынан, салгыы МСВ отделениетын взводка стрелогунан сулууспалаабыта. 1947 с. 31-с туспа мотоциклетнай батальоҥҥа пулеметчигынан сулууспалаан баран, 1948-1950 сс. Чита уобалаһын Оловяннай станция таһынааҕы байыаннай ыскылаакка харабыллаабыта. 1950 с. армияттан дойдутугар кэлэн, Чурапчытааҕы педучилищеҕа үөрэҕин салҕаан, онтон Саха Государственнай университетын ИФФ РОЯШ отделениетын бүтэрэн учуутал буолан, Аллайыаха, Таатта, Горнай, Чурапчы, Томпо улуустарынан учууталынан, завуһунан, директорынан үлэлээбитэ. Кэргэннэммитэ, оҕолордоох, сиэннэрдээх.

Наҕараадалара: Аҕа дойду сэриитин II-с степенэ орден, «Германияны кыайыы иһин», «ССРС Сэбилэниилээх Күүстэрин 50 сыла», «1941-1945 сс. Аҕа дойду Улуу сэриитигэр килбиэннээх үлэтин иһин», Улуу Кыайыы үбүлүөйдээх сылларын мэтээллэрэ, «Отличный мотоциклист», «Отличный пулеметчик» бэлиэлэр.

«Чөркөөх» кинигэ II-с баһыттан